ᖃᐅᒪᓂᖅ ᐃᓯᖅᑎᓪᓗᒍ. ᐱᒋᐊᖅᑎᑦᑎᒋᑦ ᐅᖃᖃᑎᒌᖕᓂᕐᒥᒃ.
ᐅᓂᒃᑳᕗᑦ
ᑭᒃᑯᓕᒫᑦ ᐊᑦᑕᕐᓇᖅᑐᒦᑦᑕᕆᐊᖃᙱᓚᑦ, ᐃᒃᐱᒋᔭᐅᑦᑎᐊᕐᓗᑎᒃ, ᐱᒻᒪᕆᐅᒋᔭᐅᓗᑎᒡᓗ ᐊᐃᑉᐸᕇᒃᑐᓂᑦ−ᑭᓯᐊᓂ ᑕᒪᑦᑕ ᑕᐃᒪᐃᓲᖑᙱᓐᓇᑦᑕ. ᐊᔪᕐᓇᕈᓐᓇᖅᐳᖅ ᐅᖃᐅᓯᖃᕆᐊᒃᓴᖅ ᐊᐃᑉᐸᕇᑦᑎᐊᙱᑦᑐᓂᒃ, ᑭᓯᐊᓂ ᑕᒪᒃᑯᐊ ᐅᖃᖃᑎᒌᒍᑕᐅᔭᕆᐊᖃᓪᓚᕆᒃᐳᑦ. ᖃᐅᒪᓂᖓ ᑕᑯᒃᓴᐅᑎᓪᓗᒍ ᐱᓕᕆᐊᖑᔪᒥ ᓄᓇᕗᒻᒥᐅᓂᒃ ᑎᓕᐅᕆᓪᓗᓂ ᑐᓴᐅᒪᖃᑦᑕᐅᑎᓂᖅᓴᐅᓕᖁᓪᓗᒋᑦ, ᐃᑲᔪᖃᑦᑕᐅᑎᓗᑎᒃ, ᐊᓯᔾᔩᓗᑎᒡᓗ.
ᐊᕐᓇᐃᑦ ᓄᓇᕗᒻᒥ ᐋᓐᓂᓯᖅᑕᐅᕙᒃᑐᑦ 13-ᖏᖅᓱᓪᓗᐊᖅᖢᓂ ᐅᓄᕐᓂᖅᓴᐅᕗᑦ ᓇᓂᑐᐃᓐᓇᖅ ᑲᓇᑕᒥ. ᑖᓐᓇ ᐱᓕᕆᐊᖑᔪᖅ ᐃᓄᖕᓂᒃ ᑲᑎᑎᑦᑎᖃᑦᑕᖅᑐᖅ ᓄᓇᕗᒻᒥ ᓄᓇᓕᐅᖃᑎᒌᒃᖢᑎᒃ ᐃᑲᔪᕋᓱᒃᖢᑎᒃ ᓄᖅᑲᖅᑎᓪᓗᒋᑦ ᐋᓐᓂᖅᓯᕆᕙᒃᑐᑦ ᐊᐃᑉᐸᕇᑦᑎᐊᕐᓂᖅᓴᐅᓕᕐᓗᑎᒡᓗ.
ᖃᐅᒪᓂᖓ ᑕᑯᒃᓴᐅᑎᓪᓗᒍ ᐱᓕᕆᐊᖑᕗᖅ ᖁᓪᓖᑦ ᓄᓇᕗᒻᒥ ᐊᕐᓇᐃᑦ ᑲᑎᒪᔨᖏᓐᓄᑦ ᓴᖅᑭᑕᐅᓪᓗᓂ ᑮᓇᐅᔭᖃᖅᑎᑕᐅᓪᓗᓂᓗ ᑲᓇᑕᒥ ᒐᕙᒪᒃᑯᓐᓄᑦ.
ᐊᐃᑉᐸᕇᒃᑐᑦ ᑲᔪᓯᑎᑦᑎᑦᑎᐊᕈᓐᓇᖅᐳᑦ.
ᐋᓐᓂᖅᑕᐅᔪᖃᕈᓐᓇᖅᑐᖅ ᑭᒃᑯᑐᐃᓐᓇᓂᒃ ᐊᐃᑉᐸᕇᓂᑦ−ᖃᑕᙳᑎᒌᒃᑐᓂᒃ, ᐱᖃᓐᓇᕇᓂᒃ, ᓄᓇᓕᖕᓂᓪᓘᓐᓃᑦ. ᑭᓯᐊᓂ ᒪᒥᓴᕈᓐᓇᕐᒥᔪᓯ. ᓴᖅᑭᔮᖅᑎᑦᑎᓚᐅᖅᑕ ᑲᒪᑦᑎᐊᕐᓂᕐᒥᒃ, ᐅᒃᐱᕆᔭᐅᓂᕐᒥᒃ, ᐃᒃᐱᒍᓱᑦᑎᐊᕐᓗᑕᓗ ᑲᑎᖃᑎᒋᔭᓕᒫᑦᑎᓐᓂ.
ᓴᖅᑭᔮᖅᑎᑦᑎᓚᐅᖅᑕ
ᓇᓗᓇᐃᒃᑲᓐᓂᕐᓗᒍ ᐅᓂᒃᑳᖅᑐᐊᓂᑦ ᐋᓐᓂᖅᓯᕆᓂᐅᑉ ᒥᒃᓵᓄᑦ ᐅᑭᐅᖅᑕᖅᑐᒥᑦ
ᖃᐅᔨᓇᓱᒡᓗᒋᑦ ᐅᓂᒃᑳᖅᑐᐊᑦ ᓱᓕᔪᓪᓗ ᐅᖃᖃᑎᒌᒍᑕᐅᓕᓲᑦ ᐊᐃᑉᐸᕇᖕᓂᐅᑉ ᒥᒃᓵᓄᑦ ᐊᑦᑕᕐᓇᖅᑕᐃᓕᒪᑎᑦᑎᓂᕐᒥᓪᓗ ᐅᑭᐅᖅᑕᖅᑐᒥ. ᖃᐅᒪᓂᖓ ᑕᑯᒃᓴᐅᑎᓪᓗᒍ ᖃᓄᐃᓕᐅᓪᓚᑦᑖᖃᑦᑕᖅᑐᓪᓗ ᓴᖅᑭᓪᓗᒋᑦ.
ᐱᑦᑎᐊᖃᑦᑕᙱᑦᑐᑦ ᐊᔾᔨᒌᙱᑉᐳᑦ. ᐅᑯᐊᖑᔪᓐᓇᖅᑐᑦ ᐋᓐᓂᖅᓯᕆᓂᖅ, ᐊᐅᓚᑦᑎᓂᐅᓪᓗᓂᓗ, ᑲᑉᐱᐊᓵᕆᓂᖅ ᐱᑦᑎᐊᙱᓴᒡᓗᓂᓘᓐᓃᑦ. ᐱᑦᑎᐊᖅᑕᐅᙱᑦᑐᑦ ᓄᓕᐊᕐᓂᒃᑰᕈᓐᓇᖅᑐᖅ, ᐃᒃᐱᖕᓂᐊᓂᒃᑯᑦ, ᑮᓇᐅᔭᑎᒍᑦ, ᑎᒥᒃᑯᑦ, ᐊᒻᒪ ᐸᒡᕕᓴᐃᓂᐅᔪᓐᓇᖅᑐᖅ ᒪᓕᑲᑕᒡᓗᓂᓘᓐᓃᑦ, ᐱᖃᓯᐅᑎᓪᓗᒍ ᖃᕋᓴᐅᔭᒃᑯᑦ.
ᐊᕐᓇᐃᑦ ᐋᓐᓂᓯᖅᑕᐅᖃᑦᑕᖅᑐᑦ ᒪᕐᕈᐃᖅᓱᓪᓗᐊᑲᓴᑦᑎᐊᖅᖢᓂ ᐊᖑᑎᓂᑦ, ᑭᓇᑐᐃᓐᓇᖅ ᐊᐃᑉᐸᕐᒥᓂ ᐋᓐᓂᖅᓯᖅᑕᐅᖃᑦᑕᕈᓐᓇᖅᑐᖅ ᐱᑦᑎᐊᖅᑕᐅᖃᑦᑕᙱᓪᓗᓂᓘᓐᓃᑦ ᐊᖏᕐᕋᒥᓂᒃ. ᐱᖃᓯᐅᔾᔭᐅᔪᑦ ᐊᖑᑎᑦ ᓄᑲᑉᐱᐊᓪᓗ.
ᐱᑦᑎᐊᙱᓐᓂᖅ ᐃᓅᓯᕐᒧᑦ ᐊᑲᐅᙱᓕᐅᕈᑎᐅᖕᒪᑦ ᓄᓇᓕᕗᓪᓗ ᐃᓚᒋᔭᐅᕗᑦ ᐋᖅᑭᒋᐊᕈᑎᒃᓴᒧᑦ. ᖃᐅᑕᒫᑦ ᐱᑦᑎᐊᖅᑕᐅᖃᑦᑕᙱᑦᑐᑦ. ᐱᒻᒪᕆᐅᕗᖅ ᑭᓇᑐᐃᓐᓇᖅ ᖃᐅᔨᒍᓂ ᐅᖃᖃᑎᖃᕈᓐᓇᕐᓗᓂ ᐃᓚᒥᓂᑦ, ᐱᖃᓐᓇᕆᔭᒥᓂᑦ, ᓄᓇᓕᖕᓂᓪᓗ, ᐃᑲᔪᖅᑎᒃᓴᖅᓯᐅᖅᐸᒡᓗᓂ, ᐃᑲᔫᑎᒃᓴᓂᒃ, ᖃᓄᖅᑑᕈᑎᒃᓴᓂᓪᓗ.
ᖃᔅᓯᑐᐃᓐᓇᑦᑎᐊᓂᒃ ᐅᑭᐅᖃᖅᖢᑎᒃ ᐱᑦᑎᐊᖅᑕᐅᖃᑦᑕᕈᓐᓃᓲᖑᕗᑦ, ᑭᒃᑯᑐᐃᓐᓇᑦᑎᐊᑦ ᐊᐃᑉᐸᕇᒃᑐᑦ. ᐃᓄᐃᑦ ᐊᓯᔾᔨᕈᓐᓇᖅᑐᑦ ᓇᓗᓇᐃᖅᓯᒍᑎᒃ ᐊᖏᕐᓗᑎᒡᓗ ᐱᐅᓯᕆᔭᒥᓂᒃ ᐊᓯᔾᔩᓗᑎᒡᓗ ᐊᐃᑉᐸᕐᒥᓄᑦ ᖃᓄᐃᓕᐅᕈᓯᕆᕙᒃᑕᒥᓂᒃ.
ᐊᑲᐅᙱᓕᐅᕈᑎᖃᖃᑦᑕᖅᐳᑦ ᐊᖏᖃᑎᒌᒍᓐᓃᖅᐸᒃᖢᑎᒡᓗ ᐊᐃᑉᐸᕇᑦᑎᐊᖅᑐᑦ−−ᐱᑦᑎᐊᖃᑦᑕᙱᑦᑐᓪᓕ ᑕᐃᒪᐃᙱᓚᑦ. ᐱᑦᑎᐊᖃᑦᑕᙱᓐᓂᖅ ᐊᐃᕙᓂᐅᑐᐃᓐᓇᙱᓚᖅ. ᑲᑉᐱᐊᓵᕆᖃᑦᑕᕐᓂᖅ, ᐋᓐᓂᖅᓯᕆᓂᖅ, ᐊᓯᖏᓐᓂᒡᓘᓐᓃᑦ ᐃᓕᖅᑯᓯᕐᓂᒃ ᐊᐅᓚᑦᑎᔪᒪᓗᓂ ᐊᓯᐊᓂᒃ ᐃᓄᖕᒥᒃ, ᐅᖃᖃᑎᒌᙱᖔᕐᓗᑎᒃ, ᐊᖏᖃᑎᒌᙱᓪᓗᑎᒃ, ᐃᒃᐱᒍᓱᑦᑎᐊᙱᓪᓗᓂᓗ.
ᐅᓄᖅᑐᓂᒃ ᐱᔾᔪᑎᖃᓲᑦ ᐃᓄᐃᑦ ᐊᐃᑉᐸᕐᒥᓂ ᕿᒪᐃᔪᓐᓇᐃᓪᓕᕙᒃᖢᑎᒃ ᐱᑦᑎᐊᖃᑦᑕᙱᑦᑐᒥᒃ ᐋᓐᓂᖅᓯᕆᖃᑦᑕᖅᑐᒥᓪᓘᓐᓃᑦ. ᐱᔾᔪᑎᖃᕈᓐᓇᖅᐳᑦ ᐱᖃᑎᓂ ᑮᓇᐅᔭᒧᑦ ᐃᑲᔪᖅᑎᒋᔭᕆᐊᖃᕐᓂᖓᓄᑦ, ᕿᒪᒃᑲᓗᐊᕈᓂᐅᒃ ᐊᖏᕐᕋᒃᓴᖃᑦᑎᐊᕋᔭᙱᒻᒪᑦ, ᐅᕝᕙᓘᓐᓃᑦ ᐊᐃᑉᐸᖓ ᑲᑉᐱᐊᓵᕆᖃᑦᑕᕐᓗᓂ ᕿᑐᕐᙵᖏᑦ ᑎᒍᐊᕆᔭᖏᓪᓘᓐᓃᑦ ᐋᓐᓂᕐᓂᐊᕐᓂᕋᕐᓗᓂᒋᑦ. ᕿᒫᙱᑐᐃᓐᓇᕆᐊᓖᑦ ᐅᒃᐱᕈᓱᒃᑲᒥ ᐊᐃᑉᐸᕇᒃᑐᓂᑦ ᓄᓇᓕᖕᒥᓂ. ᐋᓐᓂᖅᓯᕆᖃᑦᑕᖅᑐᒥᒃ ᐊᐃᑉᐸᕐᒥᓂ ᕿᒪᐃᖃᑦᑕᖅᑐᑦ ᐅᓗᕆᐊᓇᖅᑐᒦᓐᓂᖅᐹᖑᖃᑕᐅᕗᑦ -- ᐊᕐᓇᐃᑦ 6−ᖏᖅᓱᓪᓗᐊᖅᖢᓂ ᑐᖁᑕᐅᑐᐃᓐᓇᕆᐊᓕᑦ ᐊᐃᑉᐸᕆᓚᐅᖅᑕᒥᓂᒃ ᒫᓐᓇ ᐱᖃᑎᒋᓕᖅᑕᒥᓂᐅᙱᑦᑐᖅ.
ᐋᓐᓂᖅᓯᖅᑕᐅᕙᒃᑐᑦ ᐅᓄᕐᓂᖏᑦ ᐊᐃᑉᐸᕐᒥᓂ ᐊᕕᒃᑐᖅᓯᒪᔪᓂ ᐊᓯᔾᔨᖅᓯᒪᙱᑦᑐᖅ ᐊᕐᕌᒍᓂ ᐊᓂᒍᖅᑐᓂ. ᖁᓄᔪᕐᓂᐊᖅᑕᐅᕙᒃᑐᑦ ᐅᓄᕐᓂᖏᑦ ᑲᓇᑕᓕᒫᒥ ᐊᓯᔾᔨᖅᓯᒪᙱᒻᒥᔪᑦ.
ᐅᓄᕐᓂᖅᓴᒻᒪᕆᐊᓗᐃᑦ, ᐃᓄᖕᒥᑦ ᖃᐅᔨᒪᔭᒥᓂᒃ ᐋᓐᓂᖅᓯᖅᑕᐅᖃᑦᑕᖅᐳᑦ, ᓲᕐᓗ ᐊᐃᑉᐸᕐᒥᓂᒃ, ᐊᐃᑉᐸᕆᖃᑦᑕᖅᑕᒥᓂᒃ, ᐱᖃᓐᓇᕆᔭᒥᓂᒃ, ᐅᕝᕙᓘᓐᓃᑦ ᐊᐃᑉᐸᕆᓚᐅᖅᓯᒪᔭᒥᓂᒃ. ᐊᐃᑦᑖᖑᒐᓗᐊᖅ, ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᓂᕕᐊᖅᓵᓪᓗ ᐊᑦᑕᕐᓇᖅᑐᒦᓐᓂᖅᓴᐅᖕᒪᑕ ᐋᓐᓂᖅᓯᖅᑕᐅᔪᓐᓇᖅᖢᑎᒃ ᖃᐅᔨᒪᙱᑕᒥᓂᒃ.
ᓱᓕᔪᑦ.
ᑖᒃᑯᐊ ᑭᒡᓕᓯᓂᐊᖅᑕᐅᓯᒪᔪᑦ ᓴᖅᑭᓚᐅᕐᓚᕗᑦ.
6x
ᓄᓇᕗᒻᒥ ᖁᓄᔪᕐᓂᐊᖅᑕᐅᕙᒃᑐᑦ ᐅᓄᕐᓂᖅᐹᖑᕗᑦ ᑲᓇᑕᒥ -- 6−ᖏᖅᓱᓪᓗᐊᖅᖢᓂ ᑲᓇᑕᓕᒫᒥ.
13x
ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᐅᖃᐅᓯᖃᕐᓂᖅᓴᐅᔪᓐᓇᖅᑐᑦ ᐊᐃᑉᐸᕐᒥᓂᒃ ᐋᓐᓂᖅᓯᖅᑕᐅᖃᑦᑕᕐᓂᖓᓂ ᑕᒪᒃᑯᓇᙵᑦ ᓄᓇᖃᖅᑳᖅᓯᒪᖏᑦᑐᓂᑦ ᐊᕐᓇᕐᓂᑦ. ᐊᕐᓇᐃᑦ ᓄᓇᕗᒻᒥ ᑲᑉᐱᐊᓵᖅᑕᐅᓪᓗᑎᒃ ᐋᓐᓂᖅᓯᖅᑕᐅᓂᖅᓴᐅᖃᑦᑕᖅᐳᑦ ᐊᕐᓇᓂᒃ ᑲᓇᑕᓕᒫᒦᑦᑐᓂᑦ.
12x
ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᓂᕕᐊᖅᓵᓪᓗ 12−ᖏᖅᓱᓪᓗᐊᖅᖢᓂ ᐃᓄᐊᖅᑕᐅᓲᑦ ᐊᓯᐅᔨᔭᐅᕙᒃᖢᑎᒡᓘᓐᓃᑦ ᐊᓯᓕᒫᖏᓐᓂ ᐊᕐᓇᓂᒃ ᑲᓇᑕᒦᑦᑐᓂᑦ.
20%
ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᐊᐃᑉᐸᕐᒥᓂᒃ ᐋᓐᓂᖅᓯᖅᑕᐅᕙᒃᑐᑦ 20%−ᖏᑦ ᐅᖃᕐᓂᖅᓴᐅᔪᓐᓇᖅᐳᑦ ᐃᓅᓯᕐᒥᓂ ᑲᑉᐱᐊᓱᖕᓂᕋᕐᓗᑎᒃ ᑕᒪᒃᑯᓇᙵᑦ ᓄᓇᖃᖅᑳᖅᓯᒪᙱᑦᑐᓂᒃ ᐊᕐᓇᓂᒃ.
7x
ᓄᓇᕗᒻᒥ ᑲᑉᐱᐊᓵᖅᑕᐅᓪᓗᑎᒃ ᐋᓐᓂᖅᓯᖅᑕᐅᕙᒃᑐᑦ ᐅᓄᕐᓂᖅᓴᐅᕗᑦ ᐊᓯᖏᓐᓂᒃ ᐊᕕᒃᑐᖅᓯᒪᔪᓂᒃ ᐅᕝᕙᓘᓐᓃᑦ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂᒃ -- 7−ᖏᖅᓱᖅᖢᒍ ᐅᖓᑖᓂ ᐅᓄᕐᓂᖅᓴᐅᓪᓗᑎᒃ ᑲᓇᑕᒥ.
0x
ᐊᐃᑉᐸᕐᒥᓂ ᐋᓐᓂᖅᓯᖅᑕᐅᕙᒃᑐᑦ ᐅᓄᕐᓂᖏᑦ ᓄᓇᕘᒥ ᐊᓯᔾᔨᓚᐅᙱᑦᑐᑦ ᐅᓄᕈᓐᓃᖅᐹᓪᓕᖅᓯᒪᙱᖦᖢᑎᒡᓘᓐᓃᑦ 2009−ᒥ 2019−ᒧᑦ.
ᐃᑲᔪᖅᑐᐃᓗᑕ
ᐃᕝᕕᓪᓘᓐᓃᑦ ᖃᐅᔨᒪᔭᕐᓂᒡᓘᓐᓃᑦ ᐋᓐᓂᖅᓯᖅᑕᐅᔪᖃᖃᑦᑕᖅᐸᑦ ᐊᐃᒃᐸᕐᒥᓂ, ᐃᓄᑑᙱᑦᑐᑎᑦ. ᑭᒃᑯᓕᒫᑦᑎᐊᑦ ᐊᑦᑕᕐᓇᖅᑐᒦᑦᑕᕆᐊᖃᙱᒻᒪᑕ, ᐃᒃᐱᒋᔭᐅᑦᑎᐊᕐᓗᑎᒃ, ᐊᒻᒪ ᐃᑲᔪᖅᓱᖅᑕᐅᓗᑎᒃ. ᐅᖃᐅᓯᕆᓇᓱᒋᐊᒃᓴᖅ ᐊᒃᓱᕈᕐᓇᕈᓐᓇᖅᑐᖅ, ᑭᓯᐊᓂ ᐃᑲᔪᖅᑕᐅᔪᒪᓗᓂ ᐱᒋᐊᕈᑎᑦᑎᐊᕙᖕᒪᕆᐅᕗᖅ.
ᐃᑲᔪᖅᑎᒃᓴᖅᑕᖃᖅᐳᖅ. ᓈᓚᒃᑕᐅᔭᕆᐊᖃᕈᕕᑦ, ᐊᔪᕆᖅᓲᔾᔭᐅᔭᕆᐊᖃᕈᕕᑦ ᑭᖑᓪᓕᕐᒥ ᖃᓄᐃᓕᐅᕆᐊᖃᕐᒪᖔᑦ ᐅᕝᕙᓘᓐᓃᑦ ᐊᑦᑕᕐᓇᙱᑦᑐᒥ ᐃᓂᑖᕆᐊᖃᕈᕕᑦ, ᐃᓕᖕᓂᒃ ᐃᑲᔪᕈᓐᓇᖅᑐᒥᒃ ᐱᑕᖃᖅᑐᖅ.